百工風華.諸羅獻藝 嘉義工藝特展作品唌人目

來自全國的64位工藝師，計共百外件無仝種類的工藝品，當咧嘉義縣表演藝術中心舉辦工藝特展，向民眾來展現傳統工藝的藝術價值佮傳承精神。

台灣工藝之家協會理事長 謝東哲表示：「幾若位人間國寶，包括工藝之家，猶是咱國家工藝成就獎，遮的全國知名的前輩，來參與帶動咱嘉義縣的工藝水準」

這改來展覽的64位工藝師，有7位提過人間國寶的榮譽。嘉義縣文化局表示，遮的作品予民眾看著傳統工藝的功夫佮精神，嘛是少年工藝師誠特殊的學習機會。

諸羅山藝起協會 蔡聰享表示「咱嘛希望講予一寡少年囡仔，看著遮的作品，來予IN傳承，予一寡少年的出來學習」

工藝師 林長龍也講：「逐家咧傳承傳統文化的部份，這馬有誠濟少年人咧參與，但是較無舞台予阮少年人，所以這款的舞台予阮來展現，會當予阮的工藝予逐家來發見」

工藝師 林千翔認為：「看無仝款的作品，然後可能會當對別人的作品角度，來提升家己學習的方向」

台灣工藝之家協會表示，這是嘉義縣第一改有遮大的工藝展覽，邀請來的工藝師佮作品，會當講有全國的規模，希望透過這改的交流，予傳統工藝的技術佮精神，會當佇嘉義縣繼續釘根。