國際油價.原料齊起 國內濟濟做食的喝起價

這禮拜汽油的價數起到3年來上懸的數字,受著國際油價佮原物料攏起價的壓力,國內餐飲佮做餅的業者攏講,無的確會先起價。經濟部長王美花表示,政府有雙機制控制油價,目前國內物價相對平穩,猶是會小心應對。另外,軍公教調薪水問題,行政院長蘇貞昌表示,會趕佇明年進前定案。

計程車運將:「規个心若像時鐘仝款,幌過來幌過去有無,油價起落去就毋知影欲落來,真煩惱啊,衝擊真大啊。」

計程車運將大聲喝袂堪得,受到國際油價起的影響,這禮拜國內油價一睏頭起8角,95無鉛汽油起甲1立31箍,創三年來新懸,連帶影響物價綴咧起,民眾感受是真深。

民眾:「平常時仔有咧記數,所以生活費總支出,會變多,就會有感覺。」

毋但油價,國際原料大起,致使輸入型通膨壓力夯懸,濟濟餐飲業宣佈起價,民生物品原料屬進口的麵粉佮bá-tah起上雄,親像麵粉已經起兩成,麭店用量濟衝擊成本,小間店頭干焦會當喙齒筋咬咧,家己吸收硬弓咧。

手工麭店師傅江先生:「起上濟的目前是麵粉,其實原來的原物料,像bá-tah或者是其他配搭的物件,本來就無俗,紲落來可能猶有會按算的,是基本工資會閣起,遮的閣加起去當然可能按算價數會開始做調整。」

外界煩惱油價物價齊起,增加民生壓力,國民黨立院黨團甚至呼籲油價莫起。經濟部長王美花表示,政府有兩項機制控制油價,雖然國內物價相對平穩,毋過猶是會小心來因應。

經濟部長 王美花:「咱有亞鄰國上低的機制,猶閣有油價的穩定機制。」

抑若明年基本工資起 5.21%,每個月薪水對兩萬四調懸到 25250箍,軍公教調薪水當時會定案?行政院長蘇貞昌表示,調薪水的方向已經確定,調整的幅度愛由委員會審議,應該會佇明年1月初1進前定案。


 

全台敬老金大調查

相關新聞