傳藝新人學戲練功夫 新秀舞臺10月中相紲登台

人講台頂三分鐘,台跤規厝間。三年出一个狀元、10年才出一个小生。為著欲予少年輩有舞台,通發揮表演藝術,國立傳統藝術中心這5年栽培欲到90位傳統戲的新演員,向藝師學台頂的生死門、拚戲台頂的真功夫。對10月中開始,就欲相連紲登台演出囉。

傳承薪傳廖瓊枝老師的苦旦歌仔韻,演李三娘的鄭云茜和演劉咬臍的江怡璇,攏是薪傳歌仔戲劇團的新秀。

做古冊戲,唱唸主要講官話的北管亂彈戲「鬧西河」,慶美園亂彈劇團的新秀吳代真也搬了真出角。

學做戲十冬外,唐美雲歌仔戲團范心瑜的表現,也予老師唐美雲看著傳承的希望。

范心瑜表示:「你徛出來就是代表老師,傳承老師的功夫,所以阮嘛袂使卸老師的面子,家己愛替家己爭一口氣」
抑若唐美雲是表示:「學戲的囡仔袂變歹。干焦親像阮咧學音樂,學鋼琴的囡仔袂變歹。其實學戲的囡仔也仝款,因為IN大部份佇戲內面,有學著真濟戲如人生、人生如戲,佇內面學著真濟道理」

為著保存臺灣本土民間劇種,國立傳統藝術中心今年第五屆的新秀舞臺,計共12个團隊、16位新秀,對歌仔戲、客家戲、豫劇到亂彈攏有。

「2021承功─新秀舞臺」策展人李國俊指出:「臺灣的劇團上濟的是布袋戲,第二就是歌仔戲。歌仔戲猶有四五百團,遮是有登記的,但是老實講,這幾年的程度已經愈來愈降落」

到今國立傳統戲劇中心已經牽成欲倚90位新秀,予in發揮的舞台,今年的演出十月中開始,望新世代傳承的好功底,會當有閣較濟人的掌聲和支持。

相關新聞

專題|全台敬老金大調查