國家鐵道博物館展覽 重現60年代觀光號列車

這是電影地獄新娘內底觀光號列車的畫面，這陣民眾會當親身體驗復原的展示車廂。國家鐵道博物館籌備處舉辦的「莒光50觀光60展覽」，透過復原工程，予民眾回顧1961年代的觀光號列車。

導覽員黃怡嘉表示：「桌面的舖排、餐具，攏是用以前的老相片去復原重現。無論是西餐餐具、調味料架仔、薰殼仔、花矸、茶鈷，其實阮攏有特別去揣和當時相siāng的樣式。」

1960年代台灣開始推捒國際觀光，觀光號嘛是頭一批有裝冷氣的的高級列車，火車頂的菜單會當看出當時的經濟發展，車頭的觀光號標示，也特別用法文的歡迎，顯示當時國際旅客盛況。

國家鐵道博物館籌備處主任鄭銘彰表示：「彼陣的社會，抑是講彼个時代的觀光號、莒光號，確實嘛是帶有一寡為著國家宣傳，抑是講顯示台灣經濟欲起飛的意義。」

參觀民眾則說：「細漢時陣攏有聽講觀光車，但是無機會來坐，所以攏是聽阿伯阿叔有咧講，有這个時間逐家來參觀看覓。」

鄭銘彰表示，除了有列車參零組件的展示，予民眾了解過去的鐵道文化、技術演進，這遍也整理濟濟的文獻資料、影音作品、透過無仝面向呈現佇咱生活記持中的火車。