新北線頂就業博覽會面試 估超過1千人次參加

新北市的線頂就業博覽會,7/19進行第二批的揣人才活動。新北市就業服務處表示,這改特別增加線頂面試,用VR科技紹介企業,予民眾透過寄送電子批,就會當揣頭路。這回的活動,可能有超過1千人來參加。

用視訊就通參加面試,新北市政府19舉辦第二波線頂就業博覽會。考量真濟民眾愛踮厝顧囡仔、抑是無方便到現場,閣有廠商這改特別增加VR科技,予求職者通佇線頂先看企業紹介了後才擲履歷表。新北市就業服務處課長蕭任涵講,「這改阮客製化,佇求才內底,其中有四間廠商是VR中已經先翕好矣,內底有足完整的企業介紹內容。」

新北就業服務處表示,雖然微解封,但是民眾大部份猶是先佇線頂揣工課較濟。另外,線頂就業博覽會七月開辦以來,因為失業來揣頭路的人占五成二,比舊年同期加欲兩成。這擺的求才行業也有小可改變。

新北市就業服務處課長蕭任涵表示,「一般服務業佮科技製造業,其實差不多大約各占兩成五左右,阮會當看著微解封,一般服務業釋放的職缺有沓沓仔提升。」

新北就業服務處指出,月初的徵才有七成是科技製造業,這馬隨店頭開門,也開始有職缺,總計有倚50間廠商提供欲千八个工課,另外只要求職者用電子批,註明欲面試的企業,IN也會統一收件轉予廠商安排線頂面試。

全台敬老金大調查

相關新聞