外送市場人人爭 南韓"Coupang"平台也進駐臺灣
加入公視會員，
按讚收藏你關注的報導
發布時間：
更新時間：
台灣對2012年開始有食食外送平台，這陣民眾對數位平台的接受度佮使用率攏真懸，也予台灣成做濟濟國際電商公司，想欲拓展的營運點，這陣有南韓亞馬遜稱號的電商龍頭「Coupang」就進駐台灣，先試營運。
欲倚晝，穿藍色䘥仔的外送員，佇倉庫出出入入，現場無招牌，看外送的箱仔才知影是南韓電商龍頭Coupang，已經進駐台灣，主要替人客送菜蔬魚肉和生活用品，這陣先佇台北市中山區試市場反應。
資策會產業分析師陳冠文說明，「其實伊有一部份是想欲透過伊的外送平台方式 ，來測試看佇台灣繼續深耕，做線頂平台，試水溫的方式。」
分析師表示Coupang未來若欲成功拍入國內電商市場，物流配送穩定度，店頭合作的數量，落訂系統敢好用，到敢有特色商品等等，攏是關鍵。其實國內對疫情爆發到今，外送需求雄雄增加2成外，五月中以罐頭、泡麵民生類和防疫物資為主，到六月轉向牛奶、菜蔬、水果，食食部份，除了糋的像鹹酥雞、速食連鎖店和手摵茶以外，猶有這項真受歡迎。
Foodpanda資深公共事務經理郭昕宜講，「健康餐盒或者是較健康類的食物，誠明顯有增加。」
外送平台也表示，疫情影響民眾食食的習慣，像食飯時間延後、較講究食物愛奇巧等等，不管紲落來疫情按怎發展，台灣民眾是愈來愈倚靠外送平台，這市場也被業界看好，會持續增加。
