嘉義餐券通換70箍中晝頓 望予弱勢學生食較好

紲落來著欲歇熱囉,毋過歇熱期間,嘉義市會繼續照顧市內三千外名經濟弱勢的囡仔。嘉義市政府也共歇熱期間,中晝頓的餐券金額,對50箍搝懸至70箍。

一本42張,總共2940箍的餐券,是嘉義市經濟弱勢學生佇歇熱這段時間,中晝頓的餐券,前進一張是50箍,但是考慮物價佮一寡家長反映,所以共金額提懸至70箍。

嘉義市民族國小家長會長黃意景:「我感覺這个計劃,應該愛妥善的執行落去,對阮嘉義市各方面,尤是是弱勢家庭的照顧會非常好。」

嘉義市教育處長林立生:「提懸營養中晝頓餐券的面額,市府大約增加230萬的支出,但是會當予總共3056位囡仔受著照顧。」

學校表示,經過學校來認定的經濟弱勢家庭,攏有來申請遮的餐券,in嘛攏有揣附近的店家來合作,保障囡仔食飯的權利,學校閣會請廠商協助注意餐券的使用。

嘉義市民族國小校長查顯良:「囡仔來遮買物件,會管制囡仔講買食品食物,一定愛共餐券用佇食品頂面,袂當買別項物件。」

目前學校因為疫情停課,但是猶是有一寡弱勢家庭的學生來學校受照顧,紲落來就歇熱矣,有家長表示,餐券加出來的20箍,毋但予囡仔有閣較濟的選擇,嘛減輕厝內袂少負擔。

九合一選戰解析

相關新聞