農民補貼1萬.漁民上濟領3萬 上緊明日入口座

行政院的紓困4.0特別預算，也有農業的紓困措施，農委會主委陳吉仲表示，符合資格的農漁民，會使提著1萬到3萬的補貼，嘛有提供40萬的農業紓困貸款。而且農委會已經建立-物流調度平台，菜蔬果子、海產，攏會當送出去，希望做伙渡過這擺的難關。

行政院的紓困4.0特別預算通過，農委會表示，這擺農委會編列著196億，其中的174億，佇排富了後，會用來做農漁民的生活補貼經費，有符合資格的農民，每一个人會使提著一萬箍；漁民愛看投保薪資，上懸會使領3萬箍，陳吉仲強調，上緊佇明仔載補貼就會撥入口座，莫著急去農會鑢簿仔，避免群聚風險。
 
陳吉仲講，這擺嘛有提供農業紓困貸款，舊年有申請農家綜合貸款的人，嘛會使閣來申請，佇還款的部份，嘛有暫時免息的措施。向望予農民會使度過這擺雄雄來的疫情難關。
  農民表示，有紓困是真好，猶毋過這擺疫情的影響，運送的時陣拄著一寡困難。陳吉仲講，有建立農產品的物流調度平台，集合郵局、民間貨運業等等單位，若是農漁民有需要，攏會使共遮的單位聯絡、得著幫助。