臺南新市國小口說藝術團 學生用臺語唱唸謠

臺南新市國小，成立一个口說藝術團，團員攏是國小學生，in用臺語上台表演跳舞唸歌，這個月閣欲巡迴臺南八間學校演出，透過囡仔古錐的表演，順紲教其他學校的學生講臺語。

學生佇台仔頂趣味閣活潑的表演，不管是牛、貓仔抑是大目水雞，大家攏做伙唱歌謠。

臺南新市國小的口說藝術團，來到歸仁國小，表演這齣內山囝婿揣頭路，台仔跤的囡仔姊、囡仔兄攏看甲真歡喜，口說藝術團為著這擺表演，才排練三禮拜爾，in全程攏用台語。
  新市國小這个社團已經成立七八冬，上細漢的學生才一年仔，in的劇本佮歌謠，攏是劉惠蓉老師寫的，伊共臺灣這塊土地的人文風景佮故事攏寫入歌謠，予囡仔那唱歌那學台語。 過去這種課程攏是揣布袋戲團，抑是其他表演團體，今年對這個月開始，是劉惠蓉老師tshuā學生，去八間學校巡迴表演，透過古錐的唸謠佮歌謠，予囡仔佇生活中輕鬆學台語。