少子化影響招生 屏東舊年6間國小.分校停辦

屏東人口流失嚴重,而且囡仔生少,會影響學校的招生,全屏東舊年有6間國小佮分校停辦,今年嘛閣有2間咧評估。

下課時間,曠闊的校園佮運動埕,只有兩三个、三四个囡仔做伙耍,高樹泰山國小,全校79个學生,其實有13人是舊年對附近的南華國小轉來的,因為in原本的學校已經停辦。

因為少子化衝擊,舊年佇屏東,包括南華國小在內,有6間國小、分校停辦,今年當咧評估另外2間國小。囡仔愈來愈少,目前全屏東164間學校,有94間學生人數無一百人,若是連紲二冬,學生無五十人,教育處就愛評估整併。
 
毋但愈來愈濟學校招無學生,嘛愈來愈濟厝無人蹛。
遮是屏東市興樂里,附近有兩間百貨公司,算是屏東市鬧熱的卵仁區,毋過行入巷仔內,煞真濟空厝,親像里內屏女新村,原底有50戶,這馬干焦賰4戶,嘛攏是老人,遮的鄰長已經90歲。
92歲的老大人,愛予90歲的老鄰長服務,吳全雅講,伊做里長26冬,里內人口對1600人減至賰800人。

今年七月,興樂里佮附近2个里欲合併,其他甚至有四个五个里合併,規个屏東市原本79个里欲減至59里,屏東人口若是降到80萬以下,紲落來連議員人數嘛愛減。

各地偏鄉人口消失的問題有偌嚴重,蹛大都市的人真僫想像,廢校甚至是廢里廢村,攏有可能會發生。

相關新聞

專題|全台敬老金大調查