幼穎兒童臺語文學 予囡仔投稿.望傳承母語

已經過身的詩人顧德莎,在生進前、拍拚推動幼穎兒童臺語文學雜誌。伊過身、兩個月後,創刊號正式出版,這陣已經出到第四期。雜誌的總編輯,希望幼穎會當對嘉義出發,成做全國國中以上、學生囝仔、學台語的文學讀物。

編輯斟酌對稿,就驚文章內底閣有啥物所在有錯誤。幼穎兒童臺語文學,是前年(tsûn-nî)癌症過身的作家顧德莎,在世的時盡力催生的台語文學雜誌,對2019創刊到今,已經出到第四期,是嘉義第一本予囡仔讀的台語文雜誌。

總編輯韓滿表示,拄開始文稿的數量無蓋濟,經過編輯群不斷去學校邀請佮紹介,目前投稿的情況愈來愈踴躍(ióng-io̍k)。

除了成做囡仔投稿的園地(uân-tē),雜誌的編輯群逐期也攏會設定佮囡仔有關係的主題,希望學校老師推廣台語文學的時陣,會當予囡仔閣較有興趣。

總編輯指出,只要學校會當提出推廣教育的計劃,幼穎兒童臺語文學雜誌攏會免費提供予學校來使用,嘛希望國家會當重視母語課程時間無夠的問題。

幼穎兒童臺語文學創刊號佇顧德莎過身兩個月了後,正式出版,徵文的對象以是全國國中以下的學生為主,總編輯韓滿表示,顧德莎在生的時捌講過,幼穎就是母語的幼苗,嘛是代代相傳的希望,希望會當透過這本雜誌,保存在地風俗民情和聲韻的使用方法。

全台敬老金大調查

相關新聞