中國.馬國提報送王列世界遺產 學者:臺灣較完整

舊年底,中國和馬來西亞欲共「送王船儀式」提報到聯合國教科文組織,申請做兩國的非物質文化遺產;毋過民間佮學術界攏跳出來講,雖然王爺信仰是對中國傳來,但經過文化大革命的破壞,佇臺灣的傳承顛倒較完整、文化內涵嘛較深,呼籲政府著愛重視。

踏跤步、擺陣勢。台南佳里金唐殿的陣頭,2019受馬來西亞麻六甲清華宮邀請,支援遶境活動,彼當陣,清華宮當恢復舉辦送王船的儀式,包括禮牲欲按怎拜,攏對台灣這爿學。想袂到舊年,馬來西亞煞和中國共同提出,將送王船儀式申請成做兩國的非物質文化遺產。

予人叫做台灣第一香的慶安宮,猶閣記錄保存所有迎送王爺的儀式細節,對台灣家己較佔優勢的文化,予別國提去申請文化遺產感覺真煩惱。毋過文化部有無仝的想法。

王爺廟是台灣數量上濟的廟,甚至濟過媽祖廟,迎王、送王的方式自南到北也真多元。學者認為,台灣對非物質文化遺產的認捌傷淺,希望國家愛對文化政策和文化外交加較重視。

全台敬老金大調查

相關新聞