那踅那看戲 "大橋1988"ﰓ觀眾轉到過去

臺北的大橋頭、最近咧搬一齣戲，而且演員就徛佇民眾的身軀邊、徛佇街頭巷尾演出。那看戲、那配合手機仔的APP，就通好綴著劇情、轉到、1988年的大橋頭

耳風戴咧，手機仔app點開，照頂面的指示行，無疑悟演員出現咧身軀邊

由在地團體、劇團kah多媒體公司三個單位共同發起編城計畫，透過訪問社區老大人，將1988年當時的茶店仔文化、角頭勢力、老百姓真實的生活故事，用實境劇場的方式呈現

1985至1990年彼站仔，經歷解嚴、開放兩岸探親、蔣經國過身等等大事件，臺灣社會出現天大的變化，劇團以這個時代做背景，共大橋頭當做演出的舞台，予民眾體驗無仝的劇場表演

用實境劇場的概念，閣加入科技APP的應用，將觀眾、演員佮城市成做趣味的連結，透過手機仔的聲音指示，綴故事中的主角行佇大橋頭的街仔路，理解過去發生的種種事件，團隊嘛向望透過新款的街頭劇場體驗，予觀眾重閣認捌這座城市。