古早時納涼"行直" 慶安宮保存百年地磚棋盤

佇臺南善化慶安宮廟，有一種佇塗跤行棋的娛樂，而且已經上百年，這个特殊的行棋方式，號做「行直」。

兩個老大人坐佇廟前的亭仔跤，當咧耍棋子。這種棋子真罕得看見、棋盤閣較稀罕，是佇塗跤的磚仔面頂行棋。

台南善化慶安宮廟方表示，這塊地磚有欲倚百年的歷史，這種棋號做「行直」。「行直」是古早時代農村社會，逐家納涼的娛樂。在地老輩講，兩个人對戰，一人12粒棋子，不管是橫的猶是直的，只要三粒連做一線、抑是共對方的棋子包起來，就會使共食掉。

古早有一句話講「神仙棋，乞丐直」。就是咧講行直是老百姓簡單的娛樂。慶安宮幾若十年前重新過翻，意外發現這個上百年的棋盤磚。予現代人嘛會使體驗這種坐佇亭仔跤激頭殼的古早行棋。