小琉球海龜相咬 網友:無人敢做公親驚罰30萬

小琉球潛水教練 小胖:「真正咧相拍，哇 遮大隻的海龜喔」

一陣人佇小琉球準備欲去藏水，行來到海坪遠遠就看著兩隻海龜若像佇相拍，行較倚共看，真正是咬來咬去。這畫面貼佇網路隨引起討論。因為若去攪擾海龜會予罰30萬，有人講，兩隻就60萬矣，無人敢去排解，驚連鞭公親變事主。翕影片的民眾講，小琉球一年四季攏看會著海龜，因為攏袂驚人，顛倒是人看著海龜愛閃，不而過欲佇水遮淺的海坪看著海龜相鬥，確實誠罕見。

小琉球潛水教練 小胖:「遐是一搭親像海坪的所在，然後就看著兩隻大海龜佇遐相咬，抑是佇耍啦，伊這是相對較罕見的，同時會有兩隻按呢，而且兩隻攏誠大隻」

屏東海生館研究人員，看著海龜相鬥的影片嘛講，實在真難得。伊表示，這兩隻攏是成年的龜公，會有相拍的行為通常是為著佔地盤、抑是生湠期相爭龜母。研究人員也提醒，成年海龜的力頭真飽，千萬毋通冒險欲去共分開，嘛有可能予罰錢。

屏東海生館副研究員 李宗賢:「影片看起來彼兩隻海龜，其實體材攏誠大，人若倚過去會有危險，其實無建議按呢，野生動物原本的自然行為，咱應該是盡量莫去共插手」

海保署海洋生物保育組科長 莊士鋒:「有人檢舉講 有人會去摸海龜抑是去共創治，（按呢)就會當處1年以下的有期徒刑拘役，抑是併科罰金6萬到30萬」

海保署表示，連續兩冬攏有八件磕著海龜予罰，其中今年小琉球就佔六件，這幾年小琉球觀光人次攏超過百萬，遊客濟、海龜嘛濟，民眾若是看著海龜一定愛保持1公尺5以上的距離，互相莫攪吵才是正範。