台語復振袂當盡靠民間 民團望中央設委員會

「53%好底蒂、7.4%抽幼穎，要求成立台語復振委員會。」

台語政策推動聯盟招學者和民意代表做伙徛出來，要求政府愛成立台語復振委員會，趕緊制定完整的台語復振政策。聯盟指出目前客語有客委會，原住民語有原民會，毋過台語煞猶無一个專責單位，干焦靠民間的力量欲來復振台語，真正足食力的。

臺師大臺文系系主任 莊佳穎：「客委會每一年45億、原民會有91億，但是目前無任何的部會佮預算是針對台語的復振。政府長期攏倚靠民間的力量，但是民間的力量有一工會無。」

臺北市議員 何孟樺：「阮臺北市一个狀況是，一个專制的人力攏無。進前中央有台語家庭的計畫，愛落實到地方的時陣，阮揣袂著一个專責的人力欲來處理，逐家攏捒來捒去無人欲做。」

台語政策推動聯盟提出數據指出，這馬65歲以上的序大閣有65.9%是會曉講台語的，毋過6-14歲的囡仔干焦賰7.4%會曉講，這款斷層也呈現出台語的死亡線，政府若準無重視，台語有一工就會消失去。

台語路協會理事長 董力玄：「阮的囡仔就是這7.4%。阮拚勢佮囡仔講，阿公阿媽攏無愛講。為啥物會按呢？閣來囡仔去學校了後，原本台語削削叫，轉來佮你講，媽媽我無愛講台語矣。為啥物？因為學校內底無人參怹講。」

民團也提出六大建議，要求政府制定台語復振政策和台語發展研究中心，制定媒體語言政策等等。民團認為台語的復振，袂當干焦文化部和教育部，應該加入國防、外交、司法和農業等等，所有的公共政策，若無漸漸台語就會變做一款表演語言，呼籲總統府和行政院，應該隨啟動台語復振委員會的設置程序。

記者 鄭亞宣 林郁凱 臺北報導