因為愛臺灣.工課需求 濟濟外國人來學台語

來自日本的宮本正也，佇公園唱伊上佮意的歌手-文夏的戀歌，唱甲非常有感情，氣口原仔袂輸臺灣人。伊自細漢就真佮意臺灣的文化和人情味，身軀穿的衫、袋仔攏有滿滿的臺灣味。佇大學畢業了後，決定欲來臺灣生活，今年是伊佇臺灣的第8冬。

日本人宮本正也講:「大學生的時陣，有來過短期的留學，差不多三禮拜爾，彼个時陣感覺臺灣人足熱情的。」

原本伊掠準家己已經足了解臺灣矣，騎跤踏車環島才發現，中南部真濟人攏是講台語的，為著欲深入臺灣，伊開始學台語。

另外一位是臺灣囝婿金鐘永，對韓國來到臺灣，上佮意唱伍佰的歌，就連丈人攏呵咾甲會觸舌。

丈人葉永忠講:「(囝婿)唱歌的時陣攏唱台語歌，我想，奇怪伊這條歌，唱甲比我較好，我比伊較頇顢。」

因為丈人、丈姆佇厝裡攏講台語，伊聽攏無，需要靠in某翻譯，為著欲和in歡喜開講、講笑詼，伊也去報名台語課。

韓國人金鐘永講:「想欲佮阮某的親情講話，所以我學台語。」丈姆花鳳嬌講:「用心啦，為著欲佮阮溝通，就去學台語。」

這兩位外國人攏是台語老師黃耀庭的學生，老師講這馬學台語的外國人不止仔濟，有分兩種原因，第一是工課需求，第二是佮意臺灣的文化來學的。

台語文化協會理事長黃耀庭講:「我教過的外國人，有韓國人、有日本人、有香港人，較特殊的，是咱這馬看，看越南工課上，有路用，當然嘛會欲來學。」

目前香港、日本、韓國的學生，普遍攏是因為佮意台語來學的，越南的學生主要是因為工課需求。顯示出來台語毋但是臺灣人的母語，閣較是外國人，熟似臺灣重要的底蒂。