傳藝中心新秀舞臺 少年演員做主角傳承演藝

「怎能殘害小生靈。」

佇台頂搬戲的是國立戲曲學院，拄畢業22歲的黃柔薰。這改伊參加傳藝中心舉辦的「新秀舞台」活動，傳藝中心予少年輩做主角、中生代的做配角，予少年人一个機會。

歌仔戲演員 石惠君：「鼓勵咱這馬新的囡仔，就是講你想欲做演藝這件代誌，其實你除了下苦心以外，閣來就是講咱希望逐家攏會當，藝德雙收予咱的歌仔戲境界較提升。」
少年輩演員 黃柔薰：「我以前攏用喙咧做戲，但是老師希望我講，我會使用我的目睭去做戲，𤆬領所有的觀眾朋友。」

「殺父仇人納命來，小子自揣死路。」

另外一位廖群瑋，伊這改特別轉去故鄉雲林林內，揣一位地方有名的布袋戲老師傅江榮華，綴伊學工夫，伊講搬布袋戲愛隨機應變，真濟老師傅佇台頂，三二句仔就來一句好笑的孽譎仔話，共台跤弄甲笑咍咍，這款本事是伊少年輩較欠缺的。

少年輩演員 廖群瑋：「咱戲當中講出來的口白，無一定是講較早老的傳落來的物件，老師有當時仔嘛會家己創新，想兩句、四句鬥做伙，不止仔好笑。」

「我為王魁犧牲。」

另外，新秀當中也歌仔戲新一代苦旦鄭紜如。這改傳藝中心第9屆的新秀舞台，攏總培養出13位少年演員，為in創造舞台，予in搬演主角，希望in繼續徛佇台頂，傳承傳統戲曲。

記者 鄭亞宣 林郁凱 臺北報導