這拜六禮拜台語認證考試 1.6萬人報名欲考

「緊喔，毋通閣趖。」

主持囡仔節目的弓蕉哥哥，主持台語兒少節目了後，就開始共台語慢慢仔抾轉來。佇製作人的鼓勵之下，準備閣一擺欲去挑戰台語認證考試。伊講伊舊年考著中級的B1、今年欲拚中高級的B2，未來閣欲挑戰上高級的C級。

藝人 弓蕉哥哥：「進前A嘛，A考過矣；這馬B1；B1閣有B2；若有機會我嘛想講，我若會用得考甲C，我就會用得去學校做老師，共囡仔教講咱這馬台語，有足濟新的詞，你嘛會當學著。」

8/2、8/3是教育部的台語認證考試，拜六考A卷、禮拜考B卷，仝款禮拜欲去做考生的，閣有77歲的楊秀霞阿媽，為著準備這場考試，寫兩本滿滿的筆記，伊希望台語莫斷去，希望會當共母語傳予伊的寶貝仔孫。

考生阿媽 楊秀霞：「阮孫真細漢，我嘛想著講伊去讀一年仔，嘛是會去行這个台語。咱台語強欲無去矣，我感覺台語的歷史，應該愛傳予咱的後代閣後代。」

阿媽講昨昏才無細膩佇便所跋倒，予救護車載去病院，頭殼紩3、4針，阿媽講伊第一个想著的是，驚無法度參加這改的考試，佳哉天公伯保庇，予伊順利出院。

考生阿媽 楊秀霞：「我咧煩惱彼工坐椅仔，毋知坐會牢無，因為自按呢摔落去按呢，趨倒跋倒。（毋過嘛是閣欲考試）著啊，所以我轉來嘛是書提起來讀矣。」

教育部自本有對外表示，規畫佇這改的考試共B卷也佮A卷仝款、改做電腦考試，毋過考慮著B卷報考的考生，有較濟序大，可能對電腦較無熟，最後決定猶是維持用紙本考試。抑若根據教育部的統計，這改報考台語認證的人數計共1萬6千548人，其中考A卷有9千775人、B卷是6千773人，教育部也希望透過台語認證考試，鼓勵閣較濟人來學台語、行向復振台語的目標。

記者鄭亞宣 林郁凱 臺北報導