國文老師兼街頭藝人 用台語教人讀古文、唱歌

高雄市旗津國中老師 葉程允：「到目前為止，全臺灣咧看，蓋成佇國中階段，可能拄仔我有法度用台語來教國文。」

用上輾轉的台語講出上自信的話，80年次的葉程允，這陣佇旗津國中教國文，將一篇一篇的古文，教囡仔用台語讀出來，是伊的本等也是伊的驕傲。伊從九冬前就開始用台語上國文課，伊講因為細漢時老師捌講過，台語是漢語的古音，咱的唐詩攏會當用台語讀，但是老師煞念袂出來，這件代誌就成做伊教冊了後的一个使命。

高雄市旗津國中老師 葉程允：「會咧做的毋是教台語這件代誌，是用台語教怹各種的智識。所以講，教台語就毋是干焦台語老師（做），應該是所有人的工課。」

高雄市旗津國中老師 葉程允：「輕輕鬆鬆，人生路途阮來行。」

吉他mooh咧佇各大活動抑是夜市仔那彈那唱，除了做老師，葉程允嘛是一位街頭藝人，藝名號做路邊食薏仁，有時陣伊上課嘛會用唱歌的方式， tshuā囡仔學唱台語歌，用上輕鬆的方式，去唌囡仔學講台語。

高雄市旗津國中老師 葉程允：「咱有綴著流行的物件，按呢會當蓋好引起囡仔的（學習）動機，然後咱可能愛對這个歌詞，（伊的）呼音、讀音，愛蓋用心、愛蓋要求，去叫囡仔讀予著，按呢做這个活動才是有意義。」

高雄市旗津國中老師 葉程允：「不聞機杼聲（不聞機杼聲）。」

最近接受高雄市立圖書館邀請辦講座，葉程允教觀眾一字一句用台語讀木蘭詩，葉程允向望有一工，台語會當成做逐家的基本能力，予講台語這件代誌，就親像佇路邊食一碗薏仁湯遐爾仔輕鬆簡單。

記者 許嘉茹 邱紹揚 高雄報導