用台語唱女性觀點 李竺芯入圍金曲6大獎項
加入公視會員，
按讚收藏你關注的報導
發布時間：
更新時間：
今仔日欲tshuā逐家來熟似，臺南的查某囝──李竺芯。伊有一首歌〈足芳足芳〉，用法語發音的方式來唱台語，引起濟濟討論。李竺芯的台語專輯《Suí水》，嘛描寫媠䆀、性自主等等的女性觀點，予伊佇今年金曲獎攏總入圍6个獎項。（新聞標題、導言及內文皆為台語文）
用法語的發音來唱台語，李竺芯的這首歌「足芳足芳」，予伊入圍金曲獎年度歌曲獎，伊講自細漢就足愛看電視，創作靈感是對「鐵獅玉玲瓏」來的。
音樂創作者 李竺芯：「以前舜哥（許效舜）攏會講一句講『Bonjour（你好）、 Bonsoir（暗安）、 磅米芳』，有真濟聽眾朋友是袂曉台語的，但是伊聽我講這寡音樂背後的故事，我是按怎寫遮的歌、用啥物音，怹就發覺講其實台語足好耍的。」
其實台語內底有真濟外來詞，包括法語和日語等等，李竺芯認為應當愛有心適的音樂、來表現台語的多元，伊的作品嘛呈現伊狡怪的個性，毋過李竺芯嘛注重描寫媠䆀、性自主等等的女性觀點，也用一首「台灣查某囝」來展現無仝模樣的女性。
台語歌「台灣查某囝」：「但是毋通袂記得台灣的查某囝，溫柔的驕傲思想的堅強。我是台灣的查某囝，一个台灣的查某囝。」
李竺芯1989年佇臺南出世，從11歲就開始參與音樂錄音佮出版，李竺芯今年入圍金曲獎的專輯「Suí水」，是伊的頭一塊台語專輯，攏總入圍金曲獎最佳台語女性歌手等等六个獎項。
音樂創作者 李竺芯：「其實這張專輯就干焦講一件代誌，就是原本的你的模樣；毋管是身體抑是心內底的，原本你生做按怎攏無要緊，攏是一種媠。」
李竺芯表示有真濟人捌佮伊講過，聽伊唱台語歌，感情的表達顛倒比華語閣較直接。李竺芯認為是當伊猶未社會化以前，母語就是台語，伊毋免變做另外一个社會期待的形，所以唱台語也予伊展現上真實的模樣。
記者 呂尚儒 莊浚佑 臺北報導
唐嘉良/編輯
