頭屆看鳥博覽會辦佇臺灣 行銷影片嘛著金獎

觀光署行銷影片「Birding in Taiwan」內容：「比論五色鳥，伊顯目的色水佮叫聲攏真有特色，閣有神秘的烏啼雞，伊予人印佇咧臺灣一千箍紙票。」

影片對臺灣大雪山國家森林遊樂區翕到高美濕地，呈現臺灣欲32種特有種鳥類，這是交通部觀光署和參山(sam-suann)國家風景區等單位製作的國際行銷影片「Birding in Taiwan」，佇第七屆日本國際觀光電影節(JWTFF)的紀錄片類別、得著金獎，觀光署希望向全世界介紹臺灣中部豐富的鳥類佮森林資源，嘛展現臺灣生態旅遊的特殊性。

參山國家風景區管理處副處長廖錫標講：「因為觀光署佇世界各國有足濟辦事處，阮攏會送去予in去做宣傳，這个著獎嘛為著算講，咱今年欲辦第一屆的世界賞鳥博覽會佇臺灣，會當創造愈濟聲量佮關注點。」

臺灣本土咱有數百種鳥仔，逐年無仝季節，臺灣也是濟濟渡鳥、遷徙旅程當中途歇睏的所在。這改協助攝影團隊提供鳥類資訊和建議的台灣野鳥協會表示，in認為觀光署若準欲推廣生態旅遊，除了愛加強遊客的教育宣導，避免民眾提物件共動物烏白飼、破壞動物家己揣食的本能，交通嘛應當建設予齊全。

台灣野鳥協會總幹事吳自強講：「你交通的部份資訊愛發達，你予賞鳥的行程和咱的文化，像臺南安平古堡、鄭成功、赤崁樓你共連結起來，其實生態之旅毋是干焦看鳥仔爾，文化之旅嘛是屬於生態之旅的一種。」

今年咱國爭取著第一屆的「世界賞鳥博覽會」欲辦佇臺灣中部的參山國家風景區，觀光署表示拍算會有25个國際賞鳥和保育組織來參與，有規劃生態旅遊論壇、來討論觀光和保育的議題，交換資訊，嘛向望提升臺灣生態旅遊咧國際上的知名度。