「臺灣尚勇」看板引議論 綠委：考慮版權用原字
發布時間：
更新時間：
前一站仔「臺灣尚勇」春仔的臺語用字引起討論，最近臺南的街仔路也出現三塊大型「臺灣尚勇」拜年kha̋ng-páng。臺南有民眾表示，這个問題早就有反映過；對此，立委林俊憲回應講，主要是考量版權問題，才會照原來的版本來印。（新聞標題、導言及內文皆為臺語文）
十字路口車輛來來去去，遠遠就看著這塊五層樓懸的春仔kha̋ng-páng真顯目，這是立委林俊憲今年上新的大型看板，欲參逐家分享臺灣著12強賽冠軍這層喜事，(翻翕：蔡其昌面冊In)毋過中華職棒會長蔡其昌，共「台灣尚勇」的春仔印出來，無用正字就引起討論(翻翕：蔡其昌面冊OUT)，這回佇臺南閣出現放大的版本，濟濟市民是認為無蓋妥當。
在地民眾：「騎車有經過有看著，毋過聽講蓋成有人講，這字有一寡毋著。」
在地民眾：「（尚）無共伊改起來，猶是用「台灣尚好」，尚可的尚，所以阮市民昨昏一下看著，感覺講實在足礙虐的。」
這个「台灣尚勇」看板是全臺頭一塊向民眾拜年來使用，這陣佇臺南三个路口攏通看著，原來是蔡其昌上林俊憲直播節目時，因為春仔發了了矣，授權林俊憲會當做kha̋ng-páng，毋過又閣予人質疑無用台文正字，林俊憲回應，是考量版權才按呢生。
立委 林俊憲：「就想講人的版本就按呢矣，阮就共尊重，照怹原來的版本。因為這電子檔就直接共印矣。（因為民眾是講希望政府會使tshuā頭，做伙用台語的正字按呢。）這个建議嘛袂bái，好啊。」
台語老師 馮勝雄：「表示講逐家有心想欲用台語來書寫，只是逐家猶閣對台語的書寫閣無講蓋熟似。所以咱就利用這个機會共逐家講，台灣尚勇應該是上下的上；咱若用高尚的尚，無論音抑是字其實攏是無蓋正確的。」
台語老師希望，趁這个機會，會使予逐家認捌正字的重要性。台語界呼籲，開喙講台語、落筆寫台文按呢才是正範的作法，怹向望政府愛tshuā頭來做典範。
記者 李晨宇 臺南採訪報導
唐嘉良/編輯
