VTuber「DIKA豚足姬」 注心推廣臺灣文化、台語
發布時間：
更新時間：
公共電視自2023年主辦「金V獎」，這是全亞洲頭一个為VTuber打造的頒獎典禮，今年咧12/7拄辦煞，現場有濟濟國內外VTuber參與，臺灣的VTuber「DIKA豚足姬」（音：豬跤）提著最佳女性VTuber獎、最佳原創歌曲獎。評審肯定DIKA佇咧以日本文化為主流的箍仔內，注心結合臺灣文化佮臺語的推廣，明確揣著家己的定位，DIKA認為臺語是臺灣文化當中的寶物，嘛向望透過VTuber的經營，通陪伴愈濟人建立臺灣的文化自信。（此則新聞標題、導言、內文皆為臺語文。）
用麵線佮芫荽的氣味，召喚民眾對臺灣文化的記憶，這是臺灣Vtuber「DIKA豚足姬」頭一條原創台語歌〈跤跡〉。但是伊講其實往過無愛講台語，是因為序大攏會笑伊台語講袂輾轉，後來出國做交換生，看著日本人、韓國人對家己的文化認同真有意識，予伊開始思考：按呢咱臺灣咧？予伊咧做Vtuber的時就有清楚的路線，欲做臺灣文化佮台語的推廣者，連家己的名攏共號做充滿臺灣意象的「DIKA（豬跤）。伊講：「臺灣人嘛是足趣味的啦，定定愛棄嫌咱臺灣人家己，咱臺灣有足濟物件，應該是愛用呵咾的方式去講，按呢咱才會進步。」
DIKA的台語歌，佇公視主辦的金V獎毋但提著最佳原創歌曲獎，伊本人嘛得著年度最佳女性Vtuber獎的肯定。評審表示佇濟濟Vtuber當中，充滿臺灣元素的經營模式，甚至突破箍仔、予袂少65歲以上的人嘛成做死忠的迷眾，是非常無簡單的代誌。評審hinac表示：「除了臺灣特色以外，其實有真濟伊個人的風格，她其實箍倚一批非常濟無咧看Vtuber的民眾。」
長期咧做文化研究的學者指出，Vtuber文化重視的是陪伴佮情感，就若像〈臺灣上勇〉這首加油歌，伊提供全國對臺灣民族的想像佮情感，學者認為，像DIKA按呢透過Vtuber的經營，佇生活中用陪伴的方式捒臺灣文化佮台語，是真重要的。臺師大臺文系助理教授劉定綱嘛講：「就算講是對台語無熟的人，伊咧這个歌曲佮表達當中嘛通感受著滿滿的情感，DIKA揣著一陣台語佮傳統、佮原鄉懷舊氣味內底的元素，伊會有呼應有感應的一陣人。」
DIKA表示家己的台語，是佇這一兩年來透過台語新聞、台語歌慢慢仔學轉來的，愈學愈感受著台語文化的深度，嘛向望透過家己的實踐佮推廣，通陪伴愈濟人建立臺灣的文化自信。
記者 呂尚儒 莊浚佑 臺北報導
盧元媜/編輯
