環保團體、大學團隊 公佈塑膠幼粒仔汙染報告
發布時間：
更新時間：
綠色和平佮臺灣海洋大學、中山大學研究團隊，公佈臺灣頭一个調查塑膠原粒汙染的報告，發現高雄林園工業區以北有四搭海坪，攏有塑膠原粒的汙染。這寡塑膠粒攏有可能會進入生物的身軀內面，呼籲政府愛重視塑膠原料汙染環境的議題。（新聞標題、導言及內文皆為臺語文）
綠色和平減塑專案主任 張凱婷：「5、6、7、8、9，9粒、10粒按呢，就是規个海坪，凊彩行幾步仔攏是。」
綠色和平環保志工佇高雄林園的中門海坪採樣，海沙經過粗篩、裝入矸仔內，到實驗室用細目的器材分離出塑膠粒仔，經過清點，中門海坪採樣兩擺的結果，分別是每公斤沙有86.23粒佮96.63粒，研究團隊料想袂到的是，遮的塑膠粒是製造塑膠產品的初級工業原料。
臺灣海洋大學副教授 許瑞峯：「其實佮當地產業結構就會有較大的關係矣，因為遮的原粒伊的來源，可能就是對製造的工場來的。」
綠色和平減塑專案主任 張凱婷：「應該愛去做閣較濟的研究調查，嘛包含對遮的塑膠生產相關的事業體，應該愛做閣較濟的盤查，去掌握塑膠原粒佇臺灣汙染的情形。」
這份臺灣頭一个塑膠原粒調查，發現林園工業區以北，包括中門在內計共四座海坪，攏有無仝程度的塑膠原粒汙染，呼籲政府愛重視塑膠生產端，原料洩漏的管制，重視塑膠原粒造成的生態問題，因為塑膠原粒可能尾仔會予咱人食入去腹肚內。
臺灣海洋大學副教授 許瑞峯：「經過風吹雨打日頭曝的風化過程，伊可能就對大粒變做細粒、閣較細的細粒仔。遮的細粒仔，就較會予生物食去，就較會入去生物的體內。」
海委會海洋環境管理組科長 陳鴻文：「海保署阮這爿會佮其他的部會，做伙和『向海致敬海岸清潔維護計畫』，分工合作積極來面對，解決海洋廢棄物的問題。」
綠色和平嘛表示，國際有真濟塑膠原粒外洩到自然環境的案例，主要出現佇石化工業區的排水管抑是海沙埔附近，臺灣除了減塑，對生產源頭的管制應該愛閣較嚴格。
記者 邱紹揚 高雄報導
唐嘉良/編輯
