新文化館台語戲劇導覽 講葉榮鐘寫臺灣政治

「若是講一切重來，咱敢有可能行出無仝款的路？我是感覺講，毋管時代按怎變化，你嘛永遠袂改變。」

演員扮演日本時代臺灣文化協會成員葉榮鐘，佮伊的好朋友莊垂勝、葉陶，三个人ﰓ民眾用看戲的方式來踅展覽。18佇咧臺灣新文化運動紀念館辦戲劇導覽，嘛用唱歌仔的方式來唱葉榮鐘所寫的詩。

「同胞受宰割，終日心惶惶。」

"哀哀美麗島"是葉榮鐘1961年寫的詩，咧寫臺灣運命的哀愁、佮對外來政權的不滿。葉榮鐘是林獻堂的秘書，1931年捌和賴和創辦文化雜誌"南音"，佇咧日本時代的臺灣政治運動伊嘛付出真濟貢獻。

製作人 李和惠：「對這首詩可以看到伊這个人，經過遮濟朝代了後，伊對臺灣史的感想佮評論，所以講會使予這馬的人參考按呢。」

導演兼編劇 黃博鈞：「伊家己後來嘛做過記者，伊一直咧這个時代的邊仔看這一切發生，特別是伊的文筆非常好，所以伊留下濟濟文字的記錄。」

戲劇導覽團隊以"看顧時代的人"做主題來呈現這齣戲，臺灣新文化運動紀念館表示，往過講著臺灣文化協會逐家攏知影林獻堂、蔣渭水，煞真罕得有人知影葉榮鐘，希望透過戲劇向民眾紹介伊。

臺灣新文化運動紀念館館員 許琇惠：「過去咱若看展覽攏是安靜一个人看，抑無就是聽阮的導覽老師佇咧講，真罕得有人用戲劇的方式去演出，所以阮就逐年攏會推出這个活動。」

館方表示，戲劇導覽紲落來猶閣有9/1和9/8兩場，攏是全台語的演出，希望招民眾做伙來那看戲、那踅展覽，嘛了解臺灣史。