木工師用台語教課 予囡仔接觸母語兼學技術

共鋸好的松木枋仔，用筅仔漆專用的油漆，這陣囡仔當咧做家己的小烏枋。
這節木工課，全程攏講台語，用母語，認捌台灣傳統工藝。

囡仔講：「我學著足濟物件，會使做，做烏枋。」
家長講：「普通時阮袂接觸著這款活動，會當予𪜶參與著按呢，老師有教足濟足濟家私頭仔，家己徙位、按呢磨，就感覺足趣味的。」
另外一个家長講：「像講老師的機械，會使軁這空，阮平常時仔也無這个機會會使教講，這个動作號做軁空。」

這節台語木工課的老師--江鳴謙，本身是做木工、做裝潢的師傅。江鳴謙講，以早佮師傅佇咧工地作穡，就是用台語；雖然這馬少年輩、做工仔人較捷講華語，伊猶是感覺，繼續傳承講台語的工地文化，是真重要。

木工師傅江鳴謙講：「足𠢕講台語的師傅，你欲叫伊用華語解說伊的工課，伊是講袂來的，其實咱的社會，台語佇工地，保存甲足完整的。」

江鳴謙自細漢踮工地，就是全台語的環境，這馬開課教技術，台語木工課也予人感覺誠心適。江鳴謙認為，透過台語木工課，毋但予囡仔動手做，體驗看覓，也傳承咱的語言佮文化，真有意義。