臺南普濟殿燈會去日本 向國際傳揚古都文化

規大片的燈海五花十色媠噹噹，這是普濟殿逐冬舊曆過年的景象，這參別攤辦甲真奢颺的燈會無仝款，連紲12冬靠著民間的力量光彩上燈，一葩一葩的花燈有獨特故事，光爍爍的燈火嘛予人對未來有真大的向望。這回臺南市文化局𤆬頭，欲佇日本仙台重現普濟燈會，用400粒花燈，欲予日本人看著臺灣古都府城典雅的傳統文化。

普濟文史研究協會執行長蔣文正，「進前雖然是三四冬前有出去參加展覽，毋過這改是以阮家己為主題，阮家己去遐佈置，阮的人員志工攏會做伙過去。」
Little Taiwan in 東北執行委員會長張菁砡，「臺灣的傳統的鼓仔燈是無仝款的，因為這每一个攏是由市民精心設計，家己手畫出來的，仙台嘛有共阮鬥宣傳，市民tshua逐家是攏足期待的。」

會選佇日本仙台展出，協會指出，因為遮是臺南的姐妹仔市，嘛是311東日本大地動海漲的大災區。這陣遮當咧沓沓興起來，in欲用花燈表達祝福，另外in嘛參布袋戲團合作，象徵好彩頭，共台灣正港本土傳統藝術紮去日本做交流。

蘇俊穎掌中木偶戲團團長蘇俊穎，「布袋戲佇臺灣嘛是一種祝福慶神，變成咱日本佮臺灣一種交流之外，予日本看著真真正正咱臺灣的文化。」

臺南市文化局長謝仕淵，「這个災後復興的精神就是民間參與，阮希望普濟燈會會當予ﰀ知影講，咱逐家攏仝款做伙，咧用這个民間參與的方式，予規个地方的文化、社會、經濟攏會使復振起來。」

仙台台灣祭7月27正式起鼓，會連紲展出一個月。仙台現場有兩百粒花燈予日本人體驗彩繪，到時會佇明年普濟燈會展出，in欲一步一步行向愈在地愈國際的目標。