國中辦文化體驗活動 tshuā學生認捌布袋戲文化

這仙穿藍色的衫兼提葵扇，是布袋戲內底的文生；抑若這仙三花笑常在會佇氣氛緊張的時，出來講笑詼化解危機。布袋戲攏總分成七大類的角色，為著予囡仔通認捌傳統文化，臺南仁德文賢國中佇歇熱期間，特別邀請劇團來學校教囡仔掠尪仔的鋩角，頭擺接觸的囡仔攏學甲歡頭喜面。

臺南市仁德文賢國中學生：「布袋戲是我第一改摸著的，真趣味。（你拄才有學著啥物件)學著布袋戲按怎行路。」

臺南市仁德文賢國中校長 陳麗如：「咱看布袋戲是足正常，毋過這馬的囡仔來講，布袋戲這个物件對in來講，有聽過、有看過，毋過伊無摸過。布袋戲內面有足濟種台詞，是足媠的台語文化。」

這擺營隊，毋干焦予in看爾，嘛予學生動手練習按怎來掠尪仔。弄布袋戲的師傅講，每一个角色咧行路的跤步手路，就愛閣參個性做配合。若欲予尪仔閣較有靈魂，上重要就是模仿角色的講話氣口。劇團嘛攢出場詩，來予in體會台語文音佮白音的優雅。

小東國加掌中劇團教學推廣組長 林宣佑：「角色出現的時陣，伊有伊足特別的口白，伊有唸詩嘛有口白，阮口白就教囡仔用台語來講。」

小東國加掌中劇團操偶師 楊裕農：「咱若欲傳承就是愛對上基層的，像講國小 國中對學校向下釘根。我感覺按呢應該是一个較有法度去延續咱布袋戲文化傳承的方法。」

古早人常在看布袋戲做議量，這嘛是臺灣本土代表性的藝術文化之一，毋過這馬布袋戲的市場漸漸稀微。劇團近來注心共文化向下釘根，IN向望有閣較濟人願意來學習。