新竹尖石鄉1查埔人駐水 搶救了後猶是死亡

熱天來到戶外耍水，清涼的溪水，實在真爽快，毋過禮拜日新竹縣尖石鄉是傳出有一个對桃園來遮耍水的民眾發生駐水意外，搶救了後猶是救無轉來。

新竹縣消防局橫山分隊隊員 林威延：「駐水的是40歲姓黃的男子，桃園市民，現場OHCA，12:39分對橫山送往新竹北榮病院。」

頂禮拜三佇竹北的新月沙埔才有一名高中生予海湧絞去，失去寶貴的性命，新竹一禮拜內發生二件駐水意外。消防局提醒民眾耍水的時，若是邊仔有人發生駐水意外，一定愛去注意這幾件代誌。

新竹縣消防局一大隊副大隊長 陳國政：「首先佇現場可能有救生環，這馬請同仁來操作，主要咱千萬毋通入去水內，只要共救生環擲予駐水的人，予伊自救。閣來附近可能會有竹篙，抑是長繚型的物件，嘛會當用來救人，甚至附近若是有塑膠的水桶，抑是會當浮起來的物件嘛會當來利用。」

最近下晡時仔，山區定定攏會落西北雨，專家提醒民眾，按怎對溪水的變化，來分辨頂流敢是當咧落大雨。

青草湖水域遊憩中心教練 鄞偉民：「水位若是有漲起來，水一定會變黃(濁)，抑是有樹枝、樹葉對(頂流)一直流落來，這時陣著愛趕緊準備離開，離開的時陣就是愛走對懸的所在。」

消防局提醒講耍水的所在，加減攏有風險，提醒逐家禁止水域千萬毋通去耍，一定愛踮合格、安全、有救生員的所在耍水，才會當耍了歡喜閣放心。