2026欲有4萬戶台語家庭？ 無實際規劃引質疑

為著欲予本土的國家語言通久長傳承落去，根據行政院「國家語言整體發展方案」，文化部按算自2022年到2026年中間欲達成台語家庭4萬戶的目標，關注這个議題的民進黨立委張雅琳佇今年三月要求文化部趕緊提出實際做法，今文化部總算有書面回應，表示欲分做「台語學習家庭」佮「台語文化家庭」兩種。

民進黨立委張雅琳，「伊就是有分學習家庭是入門的，可能伊的台語無講足輾轉的，文化家庭就是ﰀ的台語較輾轉的，所以ﰀ攏是愛申請的，攏是愛申請攏愛登記按呢，攏愛去上一寡課來累積點數，才有法度來認證，伊到底是學習家庭咧抑是文化家庭。」

針對「台語學習家庭」，文化部向望透過送台語意識培訓的禮包和上課累積點數的方式，來予「無台語意識」的家庭轉變做「有意識」去推動台語的傳承。立委張雅琳指出遮的做法猶無夠，應當愛共整體的台語資源攏規畫入去。

民進黨立委張雅琳，「小朋友看的bàng-gà配音，bàng-gà的節目內底應該愛有台語的部份，因為這是創造一个大的環境，無你講這个大禮包我是感覺講，因為你無彼个，人為什麼愛去學一個東西，一定有一个刺激嘛，我有這个刺激來的時陣，你就想講、開始會曉想，一直接觸一直接觸的時陣，才開始有這个意識。」

另外，佇咧台語文化家庭的部份，文化部的規畫是拍算欲用補助共學團的方式，予台語家庭來申請，進一步促進台語社區的產生。長期咧經營台語共學團的台灣台語路協會表示，欲招共學上大的困境就是僫揣著免費的空間。

台灣台語路協會理事長董力玄，「親像客語ﰀ有足濟客家文化園區，彼若是客語的團體去借，就是會使免費抑是講會使拍折，但是台語目前就是攏無按呢的所在，咱目前全台灣就干焦，彰化有一个台語的文化園區爾。」

另外，協會嘛呼籲文化部，若欲規畫相關的台語意識培訓課程、抑是台語的相關活動，第一線的執行單位嘛應當愛接受台語意識的訓練，對語言的傳承、復振佮使命感攏愛有了解，予提台語補助的活動，有一定的品質要求。