日本短篇小說選「羅生門」 今推出台語文版本
發布時間：
更新時間：
最近世界文學的台語翻譯，除了前衛出版的「都柏林人」，猶閣有一本木馬文化的「羅生門」，佇網路冊店的排名原仔真好。羅生門是一本短篇小說選集，原作者是日本文學家芥川龍之介，內容寫濟濟人生的哲學，翻譯者是林東榮，伊表示家己原底是台語文的青盲牛，是67歲退休以後才開始學寫，嘛是希望用家己的語言能力，共台語的底蒂保留落來，貢獻予社會。
有聲冊相佮布袋戲主演王凱生的配音，這段是日本文學家芥川龍之介，短篇小說「羅生門」的一部份。最近木馬文化出版的短篇小說選《羅生門》，共八篇芥川龍之介的作品，翻做台語文。翻譯者是今年74歲的林東榮，伊表示家己以前袂曉寫台語文，是67歲退休以後才沓沓仔學寫的。
芥川龍之介是佇1892年出世，一世人寫欲四百篇短篇小說，是日本近代文學三大作家之一。《羅生門》這本短篇小說選，題材包括對外表的掛意、追求夢想的不安，抑是對善惡的思考等等。出版社表示，遮的攏誠倚貼咱的生活，嘛真適合青少年和台語文初學者。
和華語冊比起來，一本台語翻譯的小說選，包括翻譯、配音、審稿等等，有濟濟事工愛做，出版社表示有影真厚工，毋過這攏是為著欲共台語的底蒂保留落來，紲來針對羅生門這本冊，嘛會辦見面會，欲招翻譯者和配音員來佮民眾開講。
張曼亭/編輯
