白色恐怖記憶日影展 𤆬大眾認捌威權時代歷史

白色恐怖記憶日影展宣傳影片，「這爿的一个小小的墓，咱講著銃決的過程內底，愛開真濟錢著無，贖屍體轉去的錢愛偌濟，公務人員三至四個月的薪水。」

影片講的是白色恐怖時期，受難者被銃決了後，家屬愛閣開錢共遺體贖轉去的心酸。台灣自1949年5月19宣佈戒嚴了後，了後的43年就是白色恐怖、無人權的日子，濟濟人被迫害、甚至過往。為著欲予愈濟人了解白色恐怖，新台灣和平基金會欲辦影展，向望社會大眾會當透過電影，用無仝角度重新記憶這段歷史。

新台灣和平基金會董事長 王美琇，「一个民族若是無歷史記憶，這个民族欲按怎定義家己，一个國家若是無歷史記憶，這个國家的精神梁柱咧佗位。」

這改影展主要展出的作品，除了1994年經典的「超級大國民」，紀錄政治犯許毅生談少年時因為參加讀冊會坐監的過去，另外，閣有1989年的「香蕉天堂」，和濟濟新世代導演的作品和動畫電影，攏是為著欲記憶白色恐怖的受難者和反抗者，基金會表示電影放煞以後閣有座談會，和觀眾進行深度的討論。

新台灣和平基金會執行董事沈清楷，「咱白色恐怖這个題目，其實台灣足濟創作者，做足濟影展佮白色恐怖有關係，所以咱共集起來，了後咧校園閣有差不多20場，佇咧校園佮學校的老師，佮學校社團鬥陣合作。」

新台灣和平基金會表示，影展已經佇網路免費開放登記領票，4/26至28會佇光點台北電影館放送。嘛當咧規畫欲共影展，搬到台灣各地巡迴。而且自5月開始，遮的白色恐怖題材的電影，嘛會佇各地學校放送、辦講座，希望台灣的歷史教育，毋但是教科書內底簡單的幾逝文字爾爾。