高雄欲設頭間臺語學校 母語團體望全臺規畫
發布時間：
更新時間：
毋管是客語抑是原住民語，目前攏已經有母語學校。高雄市政府這馬也當咧規劃全臺灣頭一間台語實驗國小，就是欲創造一个台語的學習環境。真濟其他地區的母語家庭聽了是蓋欣羨，母語家庭希望各縣市攏會當設。有學者是認為，應該搝到中央的層級來推動。
苗栗縣僑育國小學生(2023.10.13)：「我是四年仔，我蹛佇市場內。」
囡仔用客語自我介紹，這是苗栗推行客語佮英語的雙語學校，僑育國小。
Tamorak共學園(2020.03.30)：「日頭的光真炎，我欲敬拜祖靈。」
老師𤆬頭用阿美話敬拜，這是花蓮的Tamorak共學園。一間講客語、一間講阿美話，毋過𪜶攏是用家己的母語來教冊、傳承文化。經過民間幾若冬的呼籲，台語學校總算也有進展，高雄市當咧爭取台灣頭間台語實驗國校。長期推捒相關議題的台語路協會表示，𪜶佇北部接觸著的地方政府，就較無強烈的意願。
台語路協會理事長，董力玄表示：「過去無這種例，所以大家拄開始會毋敢做，希望講，這个高雄𪜶做出第一間，遮的經驗會使湠出去。」
學者也鼓勵，目前台灣猶是華語單一化的社會，若通共母語抾轉來生活中，無仝語言的切換會當幫助囡仔發展，這甚至是關係著規个國家的代誌。學者認為，應該搝到中央的層級去推動。
台師大台語系副教授，劉承賢表示：「兩種語言定定使用，來提升囡仔智力的發展，來延緩囡仔未來大漢了後老化的速度，這是關係著咱規个國民國家發展的好事，希望這个代誌會當提升到中央政府的層級。」
學者表示，設立台語學校通增加講台語的環境，創造多元語言的環境，是關係著規个國家的發展，望中央政府會當重視，未來也通佇無仝縣市設立台語學校。
記者
陳怡臻/編輯
