全國第一間臺語實驗小學 路竹某間國校試辦

高雄路竹一間國小予教育局初步選定，欲佇遮成立全臺第一个台語實驗小學，蹛佇附近的家長大多數攏表達支持。

這間學校，目前學生攏總有六十外位，社區居民表示講，遮的囡仔攏是佮阿公阿媽蹛做伙，自然會曉講台語，這學期全校的學生本土語課程攏是選台語，這馬成立台語實驗小學的消息傳出來，已經有母語家庭的家長準備欲共囡仔送來遮讀冊。

未來台語實驗小學，所有課程攏用臺語上課，有家長會煩惱，比如講數學、自然課，用台語敢會教袂好勢，台語老師認為講，若是拄著專有名詞，會當用華語來解釋，主要愛營造全台語的環境，予學生開喙講台語。

教育局表示，本土教育委員會揣真濟間學校評估，才選定路竹的這間學校，毋過猶是愛等學校校務會議通過，才會對外公佈，按算明年高雄的台語實驗學校，就會當正式開課。