「夏日的文化洋行」 文夏用一生見證臺灣音樂史

1959年文夏翻唱「黃昏的故鄉」，是濟濟臺灣人的共同記持。另外，像「媽媽請你也保重」、「再會呀港都」等等，也攏是文夏的代表作，伊的音樂人生是台語流行歌歷史非常重要的一部份。為著欲予大眾認捌文夏，和臺灣流行歌的發展史，紀錄片「夏日的文化洋行」 自2018年就開始籌備，為文夏做口述歷史，佇今年總算完成。

導演洪榮良表示：「老師一生堅持咧做音樂咧創作，所以文化洋行嘛代表，老師的音樂，老師的影響力，若親像熱天的太陽仝款。」

1928年5月20文夏佇臺南出世，一生創作一千二百首台語歌，拍11齣台語電影，提過金音獎和金曲獎的特別貢獻獎，是臺灣的國寶歌王，90歲的時甚至閣辦個人演場會，佇2022年過身、食到94歲。太太文香表示，拍紀錄片是文夏的遺願，向望共家己的一切攏留予世人做紀念。

資深藝人文香表示：「上蓋至親上蓋至愛的遮的好朋友，逐家攏來共伊加油，攏有加入佇這部片的內底，所以老師我相信，伊一定會足歡喜，共伊的紀錄片完成甲遮爾好。」

文夏見證台語歌和台語電影的黃金歲月，也留予臺灣濟濟珍貴的文化資產，影響一代閣一代的創作者。紀錄片團隊表示，目前干焦開放包場，毋過嘛有規畫佇年底，欲開放予大眾自由買票入電影院看，向望逐家做伙來了解文夏和臺灣歌的故事。