新竹3/2辦繪本市集 用母語講故事、搬布袋戲

風城囡仔劇團演出趣味的台語舞台劇，予現場的觀眾看甲笑咳咳，家長講會予囡仔用台語去表演，上重要的就是希望囡仔，自細漢接觸母語，用母語生活。

小朋友，「一鼠賊仔名、二牛駛犁兄、三虎peh山坪、四兔遊東京、五龍皇帝命、六蛇予人驚」

家長，「予囡仔自細漢就會當接觸母語，予in會曉講會當用就變成生活一部份，我感覺足重要的。」

新竹市文化局結合27間獨立冊店以及母語團體，準備欲佇這禮拜六舉辦繪本市集活動，來推廣閱讀。無論大人抑是囡仔，攏愛加閱讀。冊店頭家希望會當對家庭做起，大人囡仔做伙閱讀。

新竹市水木書苑頭家蘇志弘，「對囡仔佮爸母來講，共同看冊這件代誌原仔是繼續進行，只是講有影到冊店的人較少矣，當然向望日後有機會，予閣較濟朋友會用得入去冊店，因為其實冊店內面的冊，是看免錢 閣來就是免排隊。」

新竹市文化局代理局長李欣耀，「予新竹地區所有的獨立冊店會當做伙，予民眾會當有機會，看著原來新竹市有，遮爾濟豐富的特色冊店。」

市集活動除了有好看的冊，現場閣有說唱表演、布袋戲以及母語故事，毋管是閱讀抑是母語，攏應該自細漢就接觸，累積做文化的養份。主辦單位邀請逐家拜六做伙去新竹公園，體驗閱讀的好、看著母語的媠。