華語翻臺語、分析腔口差 AI科技助母語復振

寫華語入去，就通翻譯做臺語，而且唸出來；這陣AI也知影，臺語有腔口差。
Tâi-gí高雄腔、tâi-gú台北腔，AI攏會曉講，這是陽明交通大學智能系統研究所所長廖元甫團隊，研發的臺語語音合成系統。

國立陽明交通大學智能系統研究所所長 廖元甫，「真濟文章啦、閣揣人來唸按呢，揣無仝的人、高雄的人、臺北的人來唸按呢，落尾是揣差不多600人，差不多全臺灣攏揣來矣。」

廖元甫參臺文系的學者合作，揣各款腔口的人來錄音；未來會閣推出更濟腔口的語音。另外團隊也設計、通分析臺文語句結構的臺文自然語言剖析器。輸入臺文句子，系統會分析這句話按怎斷句、閣有詞性，按怎變調。

國立陽明交通大學智能系統研究所所長廖元甫，「對名詞辨認、對文法面頂，先共做一个分析，這是傳統做語言分析的第一步。」

臺語顧問吳玉祥，「對學臺語的人我感覺是幫贊真大，學臺語上困難的所在，就是聲調、變調是上大的問題。」

廖元甫講，分析語句的系統，是臺語AI發展的第一步，伊望佇未來的2年到3年，通發展出臺語的語音自動翻譯系統，毋過這就需要閣較大量的語言資料庫，這也是目前當咧拍拚的。