青年民主回鄉列車52路線 113箍坐車轉厝投票

拜六就是投票日，濟濟人攏趕佇今仔欲回鄉投票，台鐵和高鐵佇1/12至15攏有加開車幫。另外，為著欲鼓勵少年家回鄉投票，減輕車資的壓力，臺灣青年民主協會、今年嘛有發起「青年民主回鄉列車」。拜五下晡佇台北車頭有開三幫客運頭幫車，欲往花蓮、高雄、屏東，載遮的少年家轉去投票。

臺灣青年民主協會理事長張育萌，「臺灣的投票制度著愛轉去戶籍地，所以對少年家造成一寡結構性的困難，少年家嘛愈正當認為，無轉去家鄉投票敢若嘛袂影響啥，阮希望拍破這款無好的循環。」

坐回鄉列車的學生張小姐講，「因為我其實蹛佇雲林，其實到臺北遮讀冊，我若是坐高鐵轉去，其實以來回的車票來講就欲2千，所以我感覺這个回鄉列車，其實會當幫助我解決遮的困境，我感覺真值得來參與。」

今年回鄉列車，拍算通協助1200个20至35歲的少年家回鄉投票，車錢只要113箍，計共52條路線，就是向望少年家積極參與政治。抑若拜六，除了東半部會落一寡雨，氣象署表示，各地多數是濟雲好天。

中央氣象署預報員葉志均說明，「咧東半部地區，其實明仔載落雨機率有提懸，特別是花東地區、恆春半島這搭，規工攏有一寡無定時的短暫雨出現。」

最後愛提醒民眾，雖罔拜六各地多數是好天，毋過早暗溫差大，猶是愛注意低溫，中部以北低溫10-14度，新竹嘉義南投透早低溫可能無10度；毋過若出日頭，氣溫就會有20度以上。