屏東荖葉做煙腸罰6萬 衛生局：影響男性生育

煙腸囥佇鼎仔內底煎，芳味誠涎人，袂少人誠佮意食，屏東有業者研發荖葉煙腸，將煙腸切開，內底青色的就是荖葉，屏東縣衛生局煞以違反食安法，罰款六萬摳，原來是因為荖葉是袂當使用的食材，業者表示講，明明荖葉是提來包檳榔，是按怎入菜就違法，in無法度接受。

業者林先生講:「早知影的話，阮就袂去做啊，阮就袂推廣，按呢會觸法。」屏東縣議員許展維講:「毋管是荖葉、艾草抑是傳統月桃葉，攏是地方創生重要的產業，攏有代表民俗歷史背景。」

議員也替業者講話，表示這位予人罰款的業者，本底就是種荖葉，為著產業轉型，才研發荖葉煙腸。屏東縣衛生局回應講，因為荖葉無安全認證，佇農業部的研究中，可能會影響著查埔人的精子，規定是袂當食。

屏東縣衛生局局長張秀君講:「農業部農研所針對荖葉去做過研究，目前伊的安全堪慮的部份，是對查埔人的精子會有影響，目前的報告是按呢。」

衛生局指出，佮荖葉仝款攏是非傳統性食品原料，閣有艾草做成草仔粿，另外月桃葉仔會用來包粽，毋過因為in毋是直接食，按呢就無問題。