拐人去便利店領貨 假包裹騙錢的愈來愈濟

佇超商提網路買的物件，是真方便，毋過超商領貨的服務，煞成做詐騙集團利用的工具。因為會有詐騙集團，發送假訊息予民眾，講伊有物件佇超商，愛民眾去提，抑若去領，就予人騙去矣。這馬警政署和超商合作，欲做伙來防止民眾予人詐騙。

警政署長 黃明昭
這擺警政署和超商合作
拍真濟影音短片
會佇超商的螢幕放送
予消費者看著這个
反詐騙的宣導內容
予民眾知影各種詐騙的手法

政府統計，舊年詐騙的案件就倚3萬件，財損的金額是欲70億。根據警政署的統計，佇超商內底上捷拄著的詐騙手法是「代碼納錢」、「無名字的包裹」、「點數詐騙」等3項。若準無細膩領著詐騙包裹，超商這馬有推出「爭議包裹退貨申請平台」，幫助消費者處理退貨。
民眾
像講領著幽靈包裹
按呢操作起來
就毋免和往過仝款
閣去聯絡廠商
這馬會使直接到平台去操作退貨
我感覺是真方便
也省真濟時間

另外，超商員工看著消費者疑似予人詐騙，嘛會主動鬥敲反詐騙專線。

民眾
我會當接受
因為這馬詐騙真濟

警政署表示，歇熱是詐騙的高峰期，比平常懸欲2成。超商表示，舊年已經協助退貨超過5萬件的詐騙包裹。會盡企業的社會責任，鬥防止詐騙，或者是利用店內廣播，呼籲民眾莫予人騙去。