解決月經散赤 立委籲學校全面提供免費衛生棉

台北市佇今年三月推動逐月發票卷補助國中女學生免費兌換衛生棉，台南市也有免費提供弱勢佮偏鄉女性的登月計畫，毋過佇台灣各縣市，猶是有真濟月經散赤的情形。

民進黨立委伍麗華說:「我看著足濟查某囡仔，其實是因為月經來的時厝內無法度提供，也無法度予伊去買，所以真濟人就是用替代的衛生紙疊較厚淡薄仔。」

佇國際查某囡仔日這工，幾若个女性立委佮民間團體做伙開記者會，用蘇格蘭免費提供月經用品做例，呼籲政府應該研議佇學校提供免費的生理用品，消除月經散赤。

另外，國際扶輪社佮法治教育基金會也特別佇這工，推動賦權查某囡仔特別獎，鼓勵學生重視性別平權，徵求生活內底性別無平等的記錄，而且提出解決方案，獎金五千箍。

法治教育委員會主委律師李岳霖說:「阮希望藉著按呢一个競賽活動，會當鼓勵參賽隊伍做伙來耕耘，做伙來發現，發現咱生活周圍敢有值得關心的兩性平權議題。」

法治教育基金會表示，會有五个特別獎的名額，參賽無限女性，男性也通參加，徵文對這馬開始到明年2月初10截止。