三跤ﰰ選情滾絞 臺北市長參選人提政見拚支持

「你加台北，就是無限。」
國民黨台北市長參選人蔣萬安，𤆬領12个青年騎鐵馬，初1到台北市選委會，正式登記參選台北市長。佇媒體訪問時，伊也對31黃珊珊登記參選時，邀請電視辯論，提出伊的想法。
國民黨台北市長參選人 蔣萬安表示：「我每禮拜攏會公佈我對台北市政的政策，紲落來也會繼續提出牛肉，黃副市長嘛愛清楚共市民朋友講，伊佮柯市長的施政方向有佗位無仝。」
佇仝一工，黃珊珊也佇大安區的競選總部，發表伊的第一个政策，喝出以首都進化雙軸線的概念開始，發展台北各區。面對質疑若是選牢，施政敢會有現任市長柯文哲的影，伊講，市政本來就是按照現有的基礎繼續行。
無黨籍台北市長參選人 黃珊珊表示：「我想市政是累積的，對面的大巨蛋留落來，你就是愛處理。如果對市民無利益的，就愛取消，若是有利的當然愛繼續做。」
另一爿佇艋舺剝皮寮，民進黨陳時中參加社福活動。針對伊前一站仔推出社會福利政見，予兩个對手認為是無實際、閣掖錢的政策，陳時中講，有意見攏會使討論，猶是強調家己的政策完整。
民進黨台北市長參選人 陳時中表示：「這是一套的有計畫的，佇政策上會使幫助，阮有新生兒的爸爸媽媽，予佇生養會使更加安心。」
台北市長選戰三跤ﰰ言詞交鋒精彩，各參選人攏陸續提出政見牛肉，欲爭取市民的支持。