中科院按民雄設航太園區 在地:期待增加就業

中科院佇嘉義民雄有設一个航太園區,為著欲掌握園區開發的進度,中科院專工到現場了解。地方也講,期待園區的設立會當創造就業的機會,予老社區有新的發展。

國家中山科學研究院航空主任,說明目前民雄航太園區開發的進度。村長講,進前這个所在是環境佮治安的死角,IN入來整理了後,這馬環境有誠大的改變。

民雄鄉雙福村長 黃福元表示,「定期咧巡邏,毋過干焦巡邏無咧維護管理。一直到164縣道通車後,來交予中科院。中科院閣來認養王梨橋,才沓沓仔開發做環境整理。」

2019年7月底第一改佇民雄舉辦說明會到今,中山科學院佇嘉義縣政府的配合之下,目前民雄院區佮無人機航太產業園區,已經進入實質開發的階段,縣政府表示,航太園區按算欲佇2025年正式對外招商。

嘉義縣長 翁章梁表示,「這個航太園區有中科院嘛有民間的產業園區,會當講是一个規畫誠成熟的基地。民雄未來這个所在產值按算一年大約有卅五億,大概會需要一千兩百外个工作人員。」

嘉義縣的無人機產業,分作民雄、太保佮義竹,民雄這爿是負責中大型商用佮軍用無人機的新創生產,嘛是實現國防自主的基地。村長表示,地方誠期待園區的設立,希望會當創造就業的機會,替老社區帶來新的發展。

全台敬老金大調查

相關新聞