募款助烏克蘭難民 咱國賑災專戶今超過4億

一通一通的電話接袂離，攏是敲來問捐款予烏克蘭的相關問題，這是外交部統籌協調，透過財團法人賑災基金會，佇3月初2成立的賑災烏克蘭專戶，統計到3月初9早起8點，已經有4億善款。

財團法人賑災基金會執行長吳欣隆：「未來這个捐款主要會用佇三大方面，主要是協助難民用佇醫療、收容安置，佮日常的民生用品。」

烏克蘭專戶募著金額，會全數交予外交部處理，參相關國家組織合作，共同執行人道援助。嫁來台灣五冬的烏克蘭人Anastasiia老厝就是佇赫爾松，伊所了解，目前烏克蘭上欠藥仔佮食物。

在台烏克蘭人Anastasiia：「烏克蘭這陣食物佮藥仔無夠，真濟人需要胰島素，但這陣根本沒藥仔。我希望政府會當發簽證，予烏克蘭人的家屬會當來台灣。我希望來台灣會當免用國際護照，我知影應該是無可能，但這就是我的向望。」

這陣也有濟濟民間團體單位，徛出來鬥相伨，Taiwan Stands With Ukraine 發起人之一張珮歆講，in盡量佇網路傳播國際相關消息，也共蹛佇台灣的外國人箍做伙。

Taiwan Stands With Ukraine發起人張珮歆：「愛予逐家知影有一陣關心這層代誌的人，會當做伙討論。你若直接佮外國人見面的時陣，你會使感受著你的支持，其實對in是有幫助的，精神上的幫助。」

除了捐款、遊行活動等等的支持，外交部也開放物資捐贈，包括日用品，醫療用品等等，詳細信息會當上外交部網站查詢。