布袋戲結合科技投影 101觀景台演出創出新路

國內傳統布袋戲結合科技投影揣出新出路。這陣有動畫導演佮聲五洲掌中劇團合作,共外台戲搬到101的觀景台內底,用四面大面的投影布景予民眾浸佇布袋文化內底。這馬導演也規劃佮國際音樂藝術節合作,希望予世界看著臺灣。

七彩的投影光線閃閃爍,民眾坐佇銀幕內底,看齊天大聖孫悟空按怎用金箍棒,去盤絲洞解救唐三藏。

結合40台投影機,四大面環狀銀幕的新型態電音布袋戲,頭擺搬入台北101觀景台,民眾看了攏呵咾甲會觸舌。

民眾:「廟口咧看布袋戲的時陣,彼个感覺就是無遮爾濟刺激的物件。這予人感覺足無仝款,足新鮮的就著矣。」

民眾:「呈現出來就若親像佮你足倚,雷射光遐嘛是變換了足好。」

做動畫出身的劉育樹導演,希望透過家己上內行的科技動畫技術,重現廟口布袋戲,目標兩年內捒8齣科技布袋戲,用四台投影機,予台灣文化走透透。

導演劉育樹:「這是我頭一擺家己租場地、家己做活動、家己做表演、家己賣票。也希望這齣作品用足簡單的方式,款款咧去到國外參加藝術節、戲偶節。」

聲五洲掌中劇團團長王英峻:「咱沉浸式算頭一改結合,咱嘛希望試一下水溫。可能佇後壁的演出內底有一寡特殊的場,咱可能是孫悟空和蜘蛛精,咱攑尪仔的師傅配合咱的投影落去演出,這嘛是後壁會用得參考的方式。」

做布袋戲超過30年的王英峻表示,疫情致使傳統戲齣行出新出路,毋過敢有法度成做成功的商業模式,猶愛靠觀眾支持,這陣也當咧和日本、澳洲接接,希望佇國際音樂節播送,予世界看著台灣。

九合一選戰解析

相關新聞