阿里山千年松梧是濟欉相攬 實際樹齡恐驚減

嘉義大學團隊開三冬的時間，對阿里山巨木做實地調查，用鑽樹芯等等的方式檢測結果有新發現。往過看起來樹圍真闊的松梧，無一定是一欉爾。

農委會林務局長 林華慶：「伊其實有一寡仔樹仔，看起來足大欉，其實是足濟欉的松梧，逐家合抱做伙的」。

嘉義大學森林暨自然資源學系助理教授 詹明勳：「合併的過程當中，伊這个髓芯就會壓縮，伊有兩个髓芯，佇這咧仝心環的這个環狀頂懸」。

研究團隊發見松梧因為樹根淺欲提懸存活率，邊仔較細叢的會倚過來，也發見往過用樹圍來估算樹仔年紀的方式，也佮實際有出入。親像較早推估的水杉大木陣是2700年，這馬算算干焦賰1081年，香林神木原底推估是2300年，也修正變626年，毋過像2號的大木陣就對800年，變1515年，真濟神木攏有新年紀。

林務局嘉義林管處處長 張岱：「較早的生長錐，伊的長度並無遐爾長，而且伊大概是做孤一个點，袂去做多點採樣，所以伊可能推估的結果，因為是用平均生長量的結果，可能會掠膨碼」。

林務局表示，這改調查除了樹木的年紀有更新，嘛發見巨木樹輪生長也會綴溫度衝懸正成長，代表這寡仔松梧受著氣候暖化影響，這項研究也通成做未來氣候變遷的觀察資料。