鼓勵拚環保 環保署推海洋廢棄物循環產品標章

用廢棄的漁網仔和海洋糞掃內底的PE聚丙烯和PA材料，做目鏡框佮目鏡keh仔，猶有企業辦清海埔活動，共抾著的100公斤海洋廢棄物，做成1000支塑膠矸仔，遮的再生品攏用超過百分之20的海洋廢料做成，得著環保署海洋廢棄物循環產品標章認證。

化工廠生產部經理 許輝煌表示：「阮的部份閣超過百分之二十，達到百分之二十六，希望逐家會當透過這一千支的矸仔，會當知影這物件是天然、環保，重複閣使用真正好的產品」

環保署副署長 蔡鴻德指出：「今年算做第一遍授證，有4个廠商、13項產品，陸陸續續，這馬猶閣規若間有欲申請的」

根據海委會統計，台灣對2017年到2021年已經清超過一千萬公斤的海洋廢棄物，其中袂當回收的材料佔欲一半，竹仔和柴排第二，廢棄漁網和掠魚工具超過7%，保麗龍3%外。為著增加海洋廢料的使用率，也有業者已經規劃用伊做電子產品。

塑膠公司執行長 洪哲耀表示：「阮今年的目標是保麗龍，到明年阮大概一年愛收到200噸」

頭批提著海洋廢棄物循環產品標章使用權的企業，有4間廠商13項產品，未來台灣欲行向零碳排放和達到循環經濟目標，環保署認為塑膠減量猶是上要緊的。