臺日新創歌仔戲"阿婆蘭" 12/25佇衛武營演出

臺灣佮日本合作的新創歌仔戲「阿婆蘭」,明仔載12/25暗時,就欲佇衛武營戶外舞台演出,這是日本藝術家佮南台灣三大歌仔戲團合作,以臺灣特有的阿婆蘭為主題,共歌仔戲佮當代藝術結合,這擺戶外演出的票,一睏仔民眾就討了了矣。

阿婆蘭是台灣原生的蘭花,這个故事就是對阿婆蘭開始,這是台灣、日本兩爿的藝術家迒領域的合作,創作出這齣全新的歌仔戲,欲按怎共台灣傳統歌仔戲佮當代藝術結合,對創作歌仔戲劇本歌詞的老師來講,是上困難的代誌。

歌仔戲劇本詞曲創作 王友輝:「歌仔戲伊是較古典的,這个題材是較現代的,所以阮咧創作過程中一直思考,欲按怎共一个現代題材,變做歌仔戲的一个語言一个唱腔來表現」。

文化部長 李永得:「這是一个台日共創,這是真無容易,共台灣歌仔戲推向另一个境界,佇南部三大天王做伙飆戲,這是賣點」。

為著這擺演出,南台灣三大歌仔戲團的天王,張秀琴、郭春美佮陳昭香,真難得佇仝一齣戲做伙演出。

春美歌劇團團長 郭春美:「這蘭花慢慢仔蔫去了後,害矣害矣,欲按怎,後來才知影講,咱既然愛惜伊,愛予伊佇原生原長的所在,毌通共蹧躂」。

雖罔拄著疫情,阿婆蘭改到25暗時佇高雄衛武營戶外劇場演出,所有的票已經予民眾討了矣,主辦單位特別開放草埔,予其他民眾嘛會當來欣賞阿婆蘭佇衛武營開花的美麗。


 

全台敬老金大調查

相關新聞