四大公投明日頓票 投票所30公尺內袂使宣傳

以圖樣來表現2018年公投的結果，中選會講這擺的公投結果出來，會增加視覺化的表現方式來予民眾參考。12月18就欲公投，公投佮選罷法的規定無仝，公投投票日猶是會使佇投票所30公尺以外進行宣傳、猶是民調的公布，中選會嘛特別說明距離的規範。

中選會副主委 陳朝建講，「投開票所四箍圍30公尺的界定，是以各投開票所的門口做標準來計算，實務上若是會使搝出30公尺的線條，阮會畫線，若是會使做記號阮會作記號。」

這擺四个案分別是重啟核四、反萊豬進口、公投縛大選佮珍愛海草礁。佇今年8月28進前滿18歲的民眾、就有投票權，計共有1982萬5468人，其中第一擺投公投的人有67萬6332人。期待投票過程順利，中選會提出五點呼籲，包括應該充分了解四个公投案的內容；愛紮身分證、印仔佮投票通知單，嘛遵守防疫規定；避免穿公投相關的衫佮紮相關物品、30公尺以內嘛袂使有干擾的行為；袂使共公投票紮離開；嘛袂使破壞公投票。

中選會主委 李進勇表示，「各直轄市、縣市計共設立368个選務作業中心，開設的投開票所有17479个投開票所。」

中選會表示，若是民眾體溫超過37.5度，就會做實聯制、佮掛手套，嘛經由無仝動線引導到專用的圈選區，離開投票所了後，手套就會回收、進行銷毀。嘛提醒居家隔離、居家檢疫的民眾，是袂使出門投票。